Mar 15 | AON | STEP | Aria ruhur atin, amam debeimi pris hani debeimi Juda hani amudok henek skulumesh um lo iri hani ihim-morim debeimi Juda hasuhw kwotog iri hantorum hape habo baraen. Aria amam hohur onohw maduhw haweshik Jisas ananish roguhw aria haran um Pailat douk nape debeini gavman iri.

Mark 15

Amam Harao Jisas Hanak Um Debeini Gavman Pailat Nape Um Hunek Kwotuman

(Matyu 27:1-2, 11-14; Luk 23:1-5; Jon 18:28-38)

1 Aria ruhur atin, amam debeimi pris hani debeimi Juda hani amudok henek skulumesh um lo iri hani ihim-morim debeimi Juda hasuhw kwotog iri hantorum hape habo baraen. Aria amam hohur onohw maduhw haweshik Jisas ananish roguhw aria haran um Pailat douk nape debeini gavman iri. 2 Douk hanak hatogur, aria Pailat narigan nakri, “Nyak douk eshesh Juda esheshin king aka?”

Aria Jisas nakripan nakri, “Adur, eik douk kabi nyak nyakrium.” 3 Aria amam debeimi pris hape henekuman baraen Jisas hadukuman sabainyi rohwin baraen. 4 Douk namudok aria Pailat narigan shopunek nakri, “Tik, amam henekumen sabainyi baraen. Aria nyak ta nyuwanamam enen baraen aka, uwok?” 5 Aria Jisas madae nukri enen baraen uwe, aria Pailat nakitak yowiyokuk abom.

Pailat Nakripesh Um Shunak Shubo Jisas Shunek Nyiluman Nir Rowog Kruse

(Matyu 27:15-26; Luk 23:13-25; Jon 18:39—19:16)

6 Ihish kwarahos ahudok nyumnah shenek agundok debeigini Pasovaigun worigun obi nyutob, Pailat apa nakweshih anan nonoweshik iri nanak fri. Anan apa nukweshih anudok douk eshesh armam armago shukriyan iri. 7 Aria abudok nyutob, anan arman douk nanahwarum Barabas iri nani anam armam hani gavman sharpak aria habo enesh arpesh shagok aria hanaweshik hape. 8 Aria sabaishi arpesh shanaki shantorum shape aria shape shakrip Pailat um nukweshih anan nape nonoweshik iri douk eshesh shukriyan iri nunak fri kabi douk ihish kwarahos anan apa nenekesh um.

9 Aria douk eshesh sharigan namudok aria Pailat narigesh nakri, “Ipak pakri ikweshih eshesh Juda esheshin king nunak fri o pakri meini?”

10 Pailat douk nakri namudok um maresh, anan douk nadukemesh abom um amam pris amamim debeimi douk henek nyigiya um Jisas. Amam hatik sabaishi arpesh shagipesh anan atun aria amam nyirub juwehosirub aturub aria douk harawan hanak henekuman kwot um Pailat. 11 Aria amam debeimi pris hohur sabaishi arpesh esheshiruh aparuh aria eshesh nyirub juwehos-irub abom um Jisas. Aria eshesh sharig Pailat um nukweshih Barabas nunak fri.

12 Aria Pailat wata shopunek narigesh nakri, “Ipak pakri eik inekan mumam anudok arman douk ipak puhwaran eshesh Juda esheshin king iri?”

13 Aria eshesh wata shopunek shahwar debeg shakri, “Nyak nyenek nyiluman rowog kruse!” 14 Aria Pailat narigesh nakri, “Anan nenek maresh yoweishi inahos um apak mon nugokumesh?”

Aria eshesh madae shumnekan uwe. Eshesh shahwar debeg atin shakri, “Nek nyiluman rowog kruse.”

15 Aria Pailat nakri nunekesh shunadudareh. Douk namudok aria anan nemnek esheshin baraen aria nakweshih Barabas nanak fri. Aria nakrip amam soldia um hunak hubo Jisas huprukan onohw maduhw segegoihw aria hunak hunek nyiluman nir rowog kruse.

Amam Soldia Hape Henekan Enenyenen Jisas

(Matyu 27:27-31; Jon 19:2-3)

16 Aria amam soldia hasuhw Jisas haran hanak hawish debeini gavmman ananit debeiti urupat aria hahwar ihim-morim amudok anam soldia shopunek hanak. 17 Aria amam horuman anat routari owishiboriti saket. Aria harokesh onohw segego hwatogrohw iri maduhw hwahwunug kabi douk king ananit hat um, aria hwahwem-uman um ananig barag. 18 Aria amam hape habubuniman hakri, “O ruwahep nyak eshesh Juda esheshin king!”

19 Aria hohur anah aruh aria hape habo barag sabaih atuh aria hape hokusehan. Aria amam henekan enenyenen hanak habuh hoduk ohrubus hurukatin um anan um hutuk ananin nyeigur nyuto iruhw kabi douk anan king um. 20 Douk amam henekan enenyenen jurug, aria hatrun hawaruk atudok owishiboriti saket. Aria wata hohur ananih rupeh hehuruman aria harawan hanakum hunek nyiluman nir rowog kruse.

Amam Henek Nyilim Jisas Neir Rowog Kruse

(Matyu 27:32-44; Luk 23:26-43; Jon 19:17-27)

21 Douk hanak orokohunih um yah aria haparug Saimon douk nanaki wabur Sairini iri. Ananim nugamim douk Aleksander nani Rufus. Anan douk nape iri urah nanaki aria nakri nunak nuwish anabur debeiburi wabur. Aria douk amam haparugan namudok aria amam soldia dodogowim atum hakripan um nosah Jisas ananin rowog kruse. 22 Aria amam harao Jisas hanak anagun douk shahwaragun um Golgota iri. Baugenyum um enyudok baraen douk nyakri arpenyig barag. 23 Aria agundok amam hakutu anan marasin nyeigurinum mer nabuhum wainibar abar aria hakri huko Jisas nuburoh. Aria anan nakri uwok. 24 Aria amam henek nyiluman neiruk rowog kruse aria hohur ananih rupeh hehubuk aria hape habirak kabi douk satu ^{▼▼15:24 Tik Aposel 1:26.} um. Amam habirak um anan nunek uhwin iri nunohur anah rupah. Aria amam henekesh namudok atinyum ihihmorim ananih rupeh.

25 Aria douk ruhur, arigaha 9 kilok wah hatao aria amam henek nyiluman neir rowog kruse. 26 Aria amudok douk henek-uman baraen Jisas iri howem enyudok baraen douk amam henek kwotuman-umen iri hakri,

ESHESH JUDA ESHESHIN KING.

aria heshopen iruhw um rowog kruse agundok Jisas neir um.

27 Aria agundok amam henek nyilim Jisas neir orokohun aria biom hakwuaruh iri heir wobuwobur hurukatin um anan. 28 [Amam douk henek nyiluman nani amudok hakwuaruh iri aria henek enyudok baraen nyetem Iruhin ananik Buk iri nyatogur adurin. Baraen douk enyudok, “Eshesh shatrun kabi douk nabrig lo iri um.”]

29 Aria arpesh shenek yowi kare iri shape shabubuniman aria sharigan shakri, “Nubokuhi nyakri nyak ta nyubrig Iruhin ananit debeiti urupat aria hukri um biyeh atih nyumneh um, nyak ta wata nyurukat! 30 Douk namudok aria douk nyak nyukweshih nyak kanak aria nyukutukuk rowog kruse nyubihi atap!”

31 Aria amam debeimi pris hani amam douk henek skulumesh um lo iri shopunek hanaki hape hahan henekan enenyenen. Aria amam kanak hanakripam hakri, “Anan nutaurum kupaishi, aria anan douk madae nutaurum anan kanak uwe. 32 Aria anan douk Krais eshesh Israel esheshin king douk Iruhin neshopokan nanaki iri akure, douk anan nukutukuk rowog kruse nubihi atap. Aria apak mutrun aria ta munek bilipuman!” Aria amudok biom douk hataur wobuwobur hurukatin um Jisas iri shopunek hahan hakripan enenyenen.

Jisas Nagok

(Matyu 27:45-56; Luk 23:44-49; Jon 19:28-30)

33 Douk aun nakihi arigaha 12 kilok aria wab babuhi. Aria ihirub-morim eshesh Juda esheshirub warub betem arukwutigun um atin. Agagun arukwutigun nape namudok arigaha wabigep 3 kilok aria wah wata hatao aria arisigun. 34 Aria wabigep 3 kilok, Jisas nahwar debeg um esheshin baraen nakri, “Eloi, Eloi, lama sabaktani?” Baugenyum um enyudok baraen douk nyakri, “Eikin Iruhin, eikin Iruhin, nyak nyakutukuk eik um maresh?”

35 Aria enesh arpesh sheyotu agundok iri shemnekan aria shakri, “Ipak pumnek, anan nahwar Ilaija.”

36 Aria anan arman nasahur nanak nohur enen spans ^{▼▼15:36 Putik futnot nyape Matyu 27:48 iri.} nosegurin anabar nubutibari abar. Aria nanyaur anah aruh aria natuken nyato um Jisas ananit nokwat um nubarah. Aria anudok arman nakripesh nakri, “Jurug aria apak mupe mutrugun. Ilaija ta nunaki nukweshihan nubuhi rowog kruse aka, uwok?”

37 Aria Jisas nahwar debeg aria anan nagok. 38 Aria ahudok rupah ^{▼▼15:37 Putik futnot nyape Matyu 27:51 iri.} hataur numun Iruhin ananit debeiti urupat iri tukarah um biyeh. Tukarahi gani iruhw arigaha hanak habuh hatao. 39 Aria amam soldia amamin debeini douk neyotu hurukatin um rowog kruse Jisas neir um natik agundok Jisas nagok um aria nakri, “Adur atin anudok arman douk Iruhin ananin nuganin!”

40 Aria agundok, ono armago weyotuwi madae rougun abom uwe aria wape watrishi. Onok douk Maria douk kwanaki wabur Makdala iri kwani Salome, wani kupaikwi Maria douk kwabuki shokuni Jems nani Josis iri. 41 Oudok armago riguk Jisas nape shokugi nahobig Galili um, owo apa wagipeshan aria wape wenekuman worigun. Aria sabaiwari kupaiwari armago douk waniri Jisas shatowi gani Jerusalem iri shopunek weyotuwi aria wape watrishi.

Habre Jisas Hanak Haruman

(Matyu 27:57-61; Luk 23:50-55; Jon 19:38-42)

42 Aria ahudok nyumnah shabo Jisas ahi, eshesh shape shenek esheshigun worigun aria mahish um ruwahepih Sabat shishoh iri. Aria ahudok atuh nyumnah arigaha wabigep, aria Josep douk nanaki wabur Arimatea iri nanaki. Anan douk anan um eshesh Juda esheshin debeini kaunsol douk nyeigur nyato-uman iri. Aria anan shopunek apa nape natrugun um abudok nyutob arpesh shuwish um agundok Iruhin nupe Debeini um ananish arpesh um. Aria Josep madae nunogugur uwe, uwok. Anan nanak um Pailat napeum aria narigan um anan nunak nubre Jisas nunak nuruman. 44 Aria douk Pailat nemnek namudok aria anan nakitak yowiyokuk abom um agundok Jisas nagok arigas abom um. Aria anan nahwar amam soldia amamin debeini nanaki aria narigan nakri, “Adur, Jisas nagok aka, watak?”

45 Aria anan nakrip Pailat um Jisas douk adur nagok. Douk namudok aria Pailat nakrip Josep um nubreyan nunak aria nuruman. 46 Aria Josep nanak nator anah yopuhi shigorihwihi rupah nasuah aria nanak nabre iri Jisas rowog kruse nabuhi atap neshurehan aria nanak naruman. Anan nanak nawish nanabuk numun onohw wonugwehw douk sharokohw shawish onok burbuduk iri. Douk nawish nanabukuk aria natogur natotigosi anam debeimi utom manaki neshopam ahwudok wonugwehw. 47 Aria Maria douk kwanaki Makdala iri kwani kupaikwi Maria douk kwabuki Josis iri wape watrugun. Aria watiku agundok douk Josep nanak nabukuk Jisas um.